|
※注意:文字版不會顯示設置密碼或隱藏的日記
察看完整版本： :::我的日記本:::: (wAncc) 又去大圍 (2004-11-18晚上)
今日去買狗糧，好辛苦！ 拎住足廿磅既狗糧由大圍返番藍田……感覺簡直想死 不過都慳左唔少呀∼o固間寵物店既姐姐成日都送野俾我（今日係個狗袋），而且同佢都幾好傾，去咁遠都冇所謂啦∼加上我鐘意大圍，o固度俾我既感覺好舒服，間唔中去下都唔錯丫∼特別係心情唔好或壓力大既時間去行下會好好多。 唉，拎到我身水身汗，但返到屋企睇見隻衰狗見到自己咁開人，咩都抵返晒！ 冬天 (2004-11-18晚上)
又係充滿食欲既季節。 我而家每日都沉迷o係食物之中，變成肥囡啦 >__< 冬天最好就梗係去南山（村）食粥架啦∼ 最近我地日日都去食，好滿足。 不過又好似難為左 FreanCa ，要佢陪我食ｄ咁清淡既野……但我真係好鐘意食o固度ｄ野呀……？ ｐ.ｓ.我食野一ｄ都唔慢，係正常速度！ 你地唔好再怪我食野慢！ 阿格食得仲慢添啦…… 我們的男朋友 (2004-11-19晚上)
今日去富富屋企 美其名就叫溫書，事實上……我同碧琪係去搗亂！ 富富屋企，我都係去過兩次咋∼ 記得好耐好耐之前去過，當時鬈毛仔（狗種：摩天使）怕陌生人，竟然嚇到o係富富張床賴尿。今日去到佢唔再怕我啦，見到我同碧琪好開心咁吠，不過，佢個口好臭呀（十幾年都冇擦牙），指甲又長，身上有陣味，富富話佢好耐都冇幫隻狗沖涼，真係懶！ 去到佢屋企，起初打算溫書，但發覺原來聚埋一齊真係溫唔到書架！最後我同碧琪都忍唔住坎入房開電腦玩，得返富富一個讀書。 我地一路 check e-mail 一面大笑，後來見富富有張相影得好好睇，於是係咁煩佢，要佢 send 俾我地，如果第時有人問我地有冇男朋友／有女仔 fd 想我地介紹ｄ男仔俾佢地識，我地就會 send 呢張相出去，富富聽完好無奈：「唔好玩啦，傻架你地！」然後又將我地既 e-mail address 加入佢個通訊錄度，改左ｄ好搞笑既名，大家都笑到肚痛。 姓龔既阿 sir (2004-11-24晚上)
本星期貓王請病假，搵左個阿 sir 代教 Econ 。 今日係第一日上o固個阿 sir 既堂 我地等左好耐，阿 sir 都唔出現 佢入左門口，滿頭大汗同我地講： 「你地學校既班房 no. 究竟係用咩羅輯泥定架？」 （講完之後全班大笑，原來佢搵唔到我地個課室） 大家對佢都好有興趣，係咁問佢ｄ私人野 有人問佢幾多歲，個答案，嘿嘿，嚇左我地一跳 原來呢個阿 sir 得廿四歲咋 （但係個樣似廿九） 佢講書比貓王簡單ｄ，一聽就明 但係就唔識教書，ｄ人都唔理佢 我後面既 Potatos 仲捉象棋添 而且都唔似教書，反而似將佢自己既功課 present 出泥咁，凈係望住個黑版同寫野，又自言自語，我地見到佢咁咪不斷偷笑。 我同阿魚講，佢好似上年代中文課既阿 sir ，又係俾我地蝦，著衫既 style 又一樣（都係 blue shirt + 西褲 + 黑色外套）阿魚話：「係喎！好似上年o固個冇 pat-pat 既阿 sir ！」 結果，呢兩堂 Econ 又係冇乜人聽書，臨落堂前，我忍唔住嘆氣：「唉，真係可憐，後生遙遙就遇上人生（教書）一大挫折（ = 我地）……」 可惡呀！ (2004-11-23晚上)
recess 食野既時候唔小心 hi 到ｄ顏料 好死唔好死竟然係紅色！ 白色既校裙搞到一撻一撻咁，好似 M 到 起初自己唔知，仲帶住我「人生既污點」行左幾層樓梯 返到班房阿魚至問我係咪 M 到，嚇親我 咁岩打鐘，Commerce 堂唔可以行開 搞到我擔心左兩堂，用冷衫摭摭掩掩 放 lunch 既時候周圍問人借 M 巾 最後發現其實係顏料！激死…… 我們的第一個冬天 (2004-11-20下午)
今年冬季似乎距離「寒冷」二字又遠了點， 雖然更適合我這種冬眠動物生長， 但還是從前那冷熱分明的季節比較好吧？ 飛天素婦 (2004-11-22晚上)
常常地抬頭望著天空，我見到了自己。 我睜大眼瞪著不見底的天空， 視力彷彿穿過大氣，遠望宇宙的種種。 隨天而飛，伴雲而遊。 總有一日我能達到， 只要我遇上「衪」－－－改寫命運的女巫的話…… 奈何現實相違。 我只不過是一把倚地而生的掃帚， 活在塵埃之中的一柄平庸掃帚， 有所不同的，只是多了點「夢」。 妳可能問：掃帚只用來清掃地方，要「夢」有何用？ 我告訴妳，我自己都不清楚。 但我還是一直渴望飛翔…… 講稿 (2004-11-26凌晨)
做得好辛苦既演辭……俾ｄ意見我丫∼ ＞ˍ＜ 相信大家都喜歡看電視節目吧？還記得劇集＜＜金枝慾孽＞＞嗎？想不到這部曾掀起一時熱潮的電視劇還被列入香港某中學的中國歷史科作教材用呢！ 據報稱，一間中學的中史科老師引用＜＜金＞＞劇與國家級正史檔案「清宮檔案」作對照，點出劇中不符真確歷史之處，教導學生判別歷史真偽。該名老師稱，劇集往往為了劇情而犧牲歷史，學生看完劇集就誤以為是正史。她又指出，透過這種將歷史融入生活化的教學方法，學生會顯得十分雀躍和投入，他們知道歷史真相後便會思考種種問題，藉以教導他們用批判的角度看歷史劇集。 到底我們對歷史、生活的認識有幾多？就讓我們也討論一下＜＜金枝慾孽＞＞和「清宮檔案」的異同之處吧！該劇中，飾演秀女的女藝人佘詩曼、張可頤等的年齡都已經二三十歲了，但根據歷史記載，清朝選秀女都是十五至十八歲的少女，年齡上已有出入。又如劇中講述秀女安茜（張可頤飾）本為平民出身，依清朝歷史記錄，任秀女的必須是八旗子弟出身的女子。加上清朝有戶籍制度，不可能如盧海鵬飾演的太監般，亂放兩個孤女入宮。儘管有太多相異的部份，但劇中的妃嬪卻真有其人，像如妃、玉瑩、爾淳等的確存在於歷史之中。 假如沒有深入的探討，我們就會被誤導。＜＜金＞＞劇雖與歷史有所出入，但只要我們願意了解事實的真相，獲益將會更多。你又會否嚮往這種學習方法呢？ 謎底解開…… (2004-11-26晚上)
由開學到而家，Potato Ip 成日都問我邊場波羸…… 有時真係覺得佢好煩，經常問我一大堆"橋"口爛讀既球隊名，咩薩拉戈薩、巴塞隆拿……仲有好多未聽過既名，搞到頭都暈！本來都唔明點解佢地成日都拎住份波經同計數機泥（辛賠率用）問我，直到今日。 班主任堂既時候佢問：「你同 Peter Wong 有咩關係？」 聽到我一頭霧水。 原來係琴佢問過我既一場波，佢唔信邪走去同我買對台，結果，輸左。 就係咁，我決定以後佢串我既我就要脅唔俾 tips 佢，wahahahaha…… 我的志願。 (2004-11-26晚上)
我的志願是賺到好多好多錢，去買我喜歡的玩具 希望去到書店不再煩惱到底該不該買書、要捨棄那一本 而是盡情地「掃貨」。 希望將來有一間尋於自己（或同朋友一齊住）既菇婆屋 可以養我心目中最想要既 dream dog －－－Saluki 同茶色 Saint Bernard，我一直都好想擁有佢地，連名都諗左啦，跟次序，係（註）茶茶同 Pencil，可以既話，我仲想養多幾隻唔同品種既狗。 每日鬧鐘一響，ｄ狗仔就過泥叫醒自己，然後我會爬上身型比較大既狗（e.g.聖伯納）身上，命令一聲：「toilet !」，ｄ狗就會揹／拖我去廁所（就係咁，我會訓練佢地知道屋企每個地方既英文發音，然後去o固度）。放工返屋企，又會見到佢地好悶心衝過泥歡迎自己，有時衝力太，大，仲會被佢地撞跌o係地下度添∼然後進行一個每日回家入門必須受到既「洗禮」（而家我都有做緊……）直至我既狗狗肯擺休為止…… 呢ｄ雖然係唔可能發生，但係我最嚮往既生活。 所以，為左我呢ｄ小小既夢想，俾心機讀書呀！ 註：茶茶一名，係因為我兩次o係街上見到既一隻茶色聖伯納，佢係我最鐘意o固一種狗，當時我望住出世冇耐既佢俾個男人抱住，就咁一見鐘情左，o固一刻我覺得好幸福感動，如果你未試過對，一樣野沉迷，你一定唔可以想像得到我o固一剎既感受，我望住隻狗慢慢離開視線範圍，心入面突然有種衝動想叫佢一聲「茶茶！」個名就係咁得返泥啦……
[KTzone]
Processed in 0.013614 second(s), 3 queries |